ბიოგრაფია

აკადემიკოსი ნიკო ჯავახიშვილი ანალიტიკურ ცენტრ „ჯეოქეისის“ კავკასიათმცოდნეობისა და ბალტიის ქვეყნების მიმართულების ხელმძღვანელია. ამავდროულად იგი კითხულობს ლექციებს ივანე ჯავახიშვილის სახელობის თბილისის სახელმწიფო უნივერსიტეტში. გახლავთ ივანე ჯავახიშვილის სახელობის ისტორიისა და ეთნოლოგიის ინსტიტუტის ახალი და უახლესი ისტორიის განყოფილების მთავარი მეცნიერ-თანამშრომელი.

2009 წლიდან ივანე ჯავახიშვილის სახელობის თბილისის სახელმწიფო უნივერსიტეტის ჰუმანიტარულ მეცნიერებათა ფაკულტეტთან არსებული საქართველოს ისტორიის ინსტიტუტის ასოცირებული პროფესორი; 2008 წლიდან საქართველოს პარლამენტთან არსებული ჰერალდიკის სახელმწიფო საბჭოს ჰერალდიკის საკითხების განმხილველი მუდმივმოქმედი კომისიის წევრი; 2018 წლიდან საქართველოს უმაღლესი და საშუალო საგანმანათლებლო დაწესებულებების საგანმანათლებლო პროგრამების აკრედიტაციის საბჭოს წევრი; ივანე ჯავახიშვილის სახელობის ისტორიისა და ეთნოლოგიის ინსტიტუტის სამეცნიერო საბჭოს წევრი; ლიტვის დიდი სამთავროს ინსტიტუტის (ქ. კაუნასი, ლიტვა) სამეცნიერო საბჭოს წევრი; საქართველოს ლატვიელთა საზოგადოება "Ave Sol!" საპატიო წევრი; საქართველოსა და საზღვარგარეთის ქვეყნებში გამომავალი რამდენიმე სამეცნიერო კრებულის სარედაქციო კოლეგიისა და სამეცნიერო საბჭოს წევრი; როგორც საისტორიო მეცნიერების დამხმარე დარგების (მათ შორის: ფალერისტიკა, ბონისტიკა, ნუმიზმატიკა, გენეალოგია, ჰერალდიკა, ვექსილოლოგია და სხვ.) სპეციალისტი, უშუალოდ მონაწილეობს საქართველოს თანამედროვე სახელმწიფო სიმბოლიკის შემუშავებაში. იკვლევს საქართველოს და კავკასიის ისტორიის, ასევე მსოფლიოს ცალკეულ ქვეყნებთან საქართველოს ურთიერთობის საკითხებს.

ნიკო ჯავახიშვილი მსახურობდა საქართველოს არმიაში. 1996-1998წწ. იყო საქართველოს თავდაცვის სამინისტროს შეიარაღებული ძალების გენერალური შტაბის სამხედრო ისტორიის განყოფილების მთავარი მეცნიერ-თანამშრომელი.

მან 1995 წელს წარჩინებით დაამთავრა თბილისის სახელმწიფო უნივერსიტეტის ისტორიის ფაკულტეტი. იყო თსუ-ს ქართული სახელმწიფო და სახალხო დიპლომატიის ისტორიის სამეცნიერო-კვლევითი ცენტრის ლაბორანტი, უმცროსი მეცნიერ-თანამშრომელი, მეცნიერ-თანამშრომელი, უფროსი მეცნიერ-თანამშრომელი. პროფესორთა საბჭომ მიანიჭა დოცენტის წოდება (2000 წ.). 2003-2006 წწ. მიწვეული იყო პროფესორის თანამდებობაზე; საკანდიდატო დისერტაცია დაიცვა თემაზე: "ქართული ფალერისტიკა" (1997 წ.), ხოლო სადოქტორო დისერტაცია თემაზე: "ქართული ბონისტიკა" (2003 წ.).

ნიკო ჯავახიშვილი არის ავტორი 260-ზე მეტი სამეცნიერო ნაშრომისა (მათ შორის 21 წიგნისა), რომლებიც გამოქვეყნებულია: ქართულ, ინგლისურ, გერმანულ, პოლონურ, ლატვიურ, რუსულ, სომხურ, თურქულ და არაბულ ენებზე; არის ლატვიის მეცნიერებათა აკადემიის საპატიო დოქტორი (2014) და იმავე აკადემიის უცხოელი წევრი (2022) ისტორიის დარგში - "ქართულ-ბალტიური ურთიერთობის ისტორიის შესწავლაში შეტანილი განსაკუთრებული წვლილისათვის". ავტორია წიგნებისა: "Ieskats Gruzijas un Baltijas tautu attiecību vēsturē", Rīga, 2015 (ლატვიურ ენაზე); "Очерки истории грузино-балтийских взаимоотношений" (Рига, 2015; Тбилиси, 2019) და სხვ.