რუსეთის მიერ უკრაინის წინააღმდეგ განხორციელებული აგრესიული მოქმედებების ფონზე, აშშ-ის კონგრესის დელეგაციის ვიზიტი საქართველოსადმი მრავალმხრივი მხარდაჭერის კიდევ ერთი გამოვლინებაა. აღნიშნული ვიზიტის მიზანი გახლავთ საქართველოს ხელისუფლებისა და ოპოზიციის წარმომადგენლებთან როგორც რეგიონული უსაფრთხოების კრიტიკულ საკითხებზე, ასევე საკანონმდებლო, ინსტიტუციურ რეფორმებთან დაკავშირებულ თემებზე მსჯელობა, - ამის შესახებ ანალიტიკური ცენტრის „ჯეოქეისის“ ამერიკისმცოდნეობისა და ევროატლანტიკური ინტეგრაციის მიმართულების ხელმძღვანელმა, პროფესორმა ხათუნა ბურკაძემ განაცხადა.
მისი თქმით, კრემლის აგრესიული პოლიტიკის ფონზე, მნიშვნელოვანია აშშ-საქართველოს სტრატეგიული თანამშრომლობის ქარტიის განახლება და რუსეთის აგრესიული მოქმედებების შემაკავებელი ახალი ინსტრუმენტების შექმნა.
„არსებული ვითარების ანალიზის შედეგად, აუცილებელია დისკუსიის დაწყება იმ ახალი ინიციატივების შესამუშავებლად, რომლებიც ხელს შეუწყობენ აშშ-საქართველოს სტრატეგიული პარტნიორობიდან ოფიციალურად სტრატეგიულ მოკავშირეობაზე გადასვლას.
აშშ-თან, როგორც საქართველოს მთავარ სტრატეგიულ პარტნიორთან თანამშრომლობის გაღრმავება აუცილებელია საქართველოში დემოკრატიული და უსაფრთხოების სფეროებში რეფორმების წარმატებით განსახორციელებლად, ახალი ეკონომიკური შესაძლებლობების შესაქმნელად და ევროატლანტიკური მისწრაფებების მისაღწევად“, - განაცხადა ხათუნა ბურკაძემ.
